२३ डिसेंबर २०२१ रोजी पहिली एनएव्ही जाहीर केलेल्या या फंडाला सुरवात होऊन दीर्घ कालावधी लोटला नसला तरी सुरुवातीपासून आतापर्यंत या फंडाने वार्षिक १५ टक्क्याहून अधिक परतावा (CAGR) दिला आहे. व्यवस्थापनातील सातत्याचाही या फंडाला फायदा झाला आहे; श्रेयस देवलकर हे या फंडाचे गेले तीन वर्षे निधी व्यवस्थापक आहेत. त्यांच्या जोडीला नितीन अरोरा आणि हितेश दास हे नियुक्त निधी व्यवस्थापक आहेत. निधी व्यवस्थापक साधारण तीन ते पाच वर्षांच्या कालावधीचा विचार करून गुंतवणुकीचे मूल्यमापन करतात. अनेक कंपन्या वाजवी मुल्यांकनामुळे आणि दर्जेदार व्यवसायांमुळे फंडाच्या सुरवातीपासून गुंतवणूकीत कायम आहेत. या दृष्टिकोनामुळे फंडाचे ‘पोर्टफोलिओ टर्नओव्हर रेशो’ (पोर्टफोलिओमधील खरेदी-विक्रीचे प्रमाण) सुमारे २९ टक्के राहिले आहे, जे या श्रेणीतील सर्वात कमी प्रमाणांपैकी एक आहे (या श्रेणीतील सरासरी प्रमाण सुमारे ८० टक्के आहे). स्टेट बँक आणि एचडीएफसी बँक यांसारखे कंपन्या जवळपास चार वर्षांपासून फंडाच्या पोर्टफोलिओचा भाग राहिले आहेत. फंडाच्या गुंतवणुकीत १०५ कंपन्या असून आघाडीच्या १० गुंतवणुकीचे प्रमाण २५ टक्क्यांहून कमी आहे. कंपन्यांची निवड तीन मुख्य निकषांवर आधारित असते: व्यवसायाचा दर्जा, व्यवस्थापनाचा दर्जा आणि मूल्यांकन. निधी व्यवस्थापक अशा कंपन्यांची निवड करतो ज्यांच्याकडे स्पर्धात्मक आघाडी (competitive advantage) टिकवून ठेवण्याची क्षमता आहे, सक्षम व्यवस्थापन आहे आणि उच्च दर्जाचे अनुपालन आहे. त्याच वेळी, हा फंड मूल्यांकनाबाबतही अतिशय जागरूक असतो. अशा व्यवसायांमधील गुंतवणूक टाळतो जिथे भविष्यातील वाढीच्या अपेक्षांची किंमत सध्याच्या मूल्यांकनात समाविष्ट झालेली असते. या फंडाच्या मूल्यांकन आराखड्यामध्ये ‘रिटर्न ऑन इक्विटी’ (RoE) हा एक महत्त्वाचा निकष मानला जातो. मध्यम कालावधीत १५-२० टक्के RoE राखण्यास किंवा गाठण्यास सक्षम असलेल्या कंपन्यांना प्राधान्य दिले जाते; कारण यामुळे कंपन्यांना अंतर्गत स्रोतांतून वाढीसाठी निधी उभारता येतो आणि भागधारकांच्या हिश्श्याचे प्रमाण कमी होणे टाळता येते. हा फंड एक वेगळा दृष्टिकोन स्वीकारतो, आणि अशी उद्योग क्षेत्रे व कंपन्या ओळखतो जिथे मूलभूत बाबीमुळे झालेल्या घसरणीमुळे नव्हे, तर तात्पुरत्या बाह्य घटकांमुळे मूल्यांकन कमी झाले आहे. हा फंड अशा कमी खरेदी केलेल्या कंपन्यांचा शोध घेतो, जिथे कमाईची शक्यता सुधारत असूनही गुंतवणूकदारांचा कल कमी झाला आहे. उदयोन्मुख व्यवसायांमध्ये, लक्ष केवळ आर्थिक मापदंडांपुरते मर्यादित राहत नाही. पोर्टफोलिओच्या रचनेत लार्ज-कॅप, मिड-कॅप आणि स्मॉल-कॅप कंपन्यांचा समावेश असतो, ज्यात बॉटम-अप स्टॉक निवड आणि चक्रवाढ वाढीवर विशेष भर दिला जातो. गेल्या काही वर्षांमध्ये, फंडाची सध्याची स्थिती लार्ज-कॅप्समध्ये ४१.३४ टक्के, मिड-कॅप्समध्ये २५.०६ टक्के आणि स्मॉल-कॅप्समध्ये २८.९७ टक्के आहे. बहुतेक इक्विटी फंड प्रकारांच्या विपरीत, मल्टी-कॅप फंड, मालमत्तेच्या आकाराची पर्वा न करता, विशेषतः स्मॉल-कॅप प्रकारच्या कंपन्यात मोठ्या प्रमाणात मालमत्ता वाटप केलेले दिसते. या फंडात स्मॉलकॅप आवश्यक तितक्या (किमान २५ टक्के) पातळीपेक्षा थोडी अधिक ठेवले आहे. स्मॉल कंपन्यांच्या वाढीमध्ये सहभागी होण्याची संधी प्राप्त करून देते. फंडाच्या गुंतवणुकीत १०५ कंपनी असून त्या पैकी ६७ कंपन्या स्मॉलकॅप प्रकारात मोडणाऱ्या आहेत. मालमत्ता प्रमाणात २८ टक्के परंतु संख्येने ५० टक्क्यांहून अधिक असल्याने उत्तम जोखीम व्यवस्थापन साधले आहे. फंड मॅनेजरच्या मते, स्मॉल-कॅप गुंतवणुकीकडे दीर्घकालीन दृष्टिकोनातून पाहिले जाते, आणि कंपन्यांना त्यांचे स्मॉलकॅप माधीन मिडकॅप मध्ये संक्रमण पूर्णपणे वापरता यावे यासाठी अनेक कंपन्या गुंतवणुकीत दीर्घकाल राखून ठेवल्या जातात. महत्त्वाचे म्हणजे, स्मॉल-कॅप परीघ विस्तारित झाल्याचा फायदा या फंडाने पूर्णपणे घेतला आहे. आज स्मॉल-कॅप म्हणून वर्गीकृत केलेल्या अनेक कंपन्यांचे बाजार भांडवल ₹३५,००० कोटींपेक्षा जास्त आहे, ज्यामुळे त्या पूर्वीच्या पारंपरिक स्मॉल-कॅप कंपन्यांपेक्षा लक्षणीयरीत्या मोठ्या आणि अधिक रोकड सुलभ बनल्या आहेत. हाच दृष्टिकोन प्रतिबिंबित करत, फंडाच्या स्मॉल-कॅप वाटपापैकी ८०-९० टक्के गुंतवणूक ₹३५,००० कोटींपेक्षा जास्त बाजार भांडवल असलेल्या कंपन्यांमध्ये केली जाते. एकूण पोर्टफोलिओमध्ये ₹१५,००० कोटींपेक्षा कमी बाजारमूल्य असलेल्या कंपन्यांमधील गुंतवणूक ५ टक्क्यांपेक्षा कमी आहे, ज्यामुळे रोकड सुलाभतेचा धोका मर्यादित राहतो.सध्या, या फंडाने वित्तीय सेवा, वाहन निर्मिती आणि वाहन पूरक उत्पादने भांडवली वस्तू आरोग्य निगा, ग्राहक विवेकाधीन व्यवसाय क्षेत्रात अधिक गुंतवणूक केली आहे.